Денеска во Основниот суд 1 Скопје треба да продолжи судскиот процес за случајот на СЈО наречен „Тврдина 2“, во кој поранешниот началник на петтата управа во УБК Горан Грујoвски и уште шестмина други вработени во оваа Управа се обвинети дека уништиле службени документи на тајната полиција за набавка на опремата за следење на комуникациите.
Судот на претходното рочиште побара од СЈО да обезбеди дозвола од УБК за да ги користи доказите кои биле доверливи и за добивање потврда кои од податоците можат да бидат јавни, а кои остануваат доверливи.
За доказите за кои УБК одговорило дека се доверливи, јавноста ќе биде исклучена од следењето на процесот.
Ова беше прво обвинение на СЈО по кое дојде до судење, а го застапуваат обвинителите Ленче Ристоска и Трајче Пеливанов.
Првообвинетиот, поранешниот началник на петтата управа Горан Грујевски, СЈО го товари за фалсификување службена исправа, односно за уништување на документацијата поврзана со двата системи од нелегалното прислушување. Овие системи, како што претходно информираше СЈО во случајот „Тврдина“, биле уништени во текот на 2015 година.
Вработените во УБК се обвинети дека уништиле 2.047 службени списи, од кои 22 се однесуваат на системите за следење на комуникациите.
Иако обвинението беше поднесено на 15 септември, судскиот процес беше закажан дури на 4 ноември бидејќи СЈО бараше изземање на судијката Лидија Петровска, кај која беше распределен предметот. Барањето беше одбиено, а одлуката ја потврди и Апелацискиот суд.
СЈО побара изземање бидејќи судијката Петровска беше спомената во една од „бомбите“ на опозицијата.
Овој случај нема официјално име како другите случаи на СЈО, но во јавноста е познат како Тврдина 2. Во процесот, обвинителитена СЈО, ќе треба да докажат дека седуммина осомничени од Управата за безбедност и контраразузнавање незаконски уништиле документи поврзани со опремата за прислушување. Се за „Тврдина 2“ во видеото на Александра Денковска Гоцевска.