Шкендија уште вечерва може да размислува на ривалот во второто квалификациско коло за Лигата на шампиони каде ќе игра со подобриот од двомечот меѓу грузиски Тоирпедо Кутаиси и Шериф Тираспол од Молдавија. Македонскиот првак го декласира ТНС со 5:0 во првиот натпревар правејќи го чиста формалност реваншот на 17 јули на „Парк Хол“ во Освестри. Претставникот на Велс беше немоќен да спречи резултатски потоп во Скопје, а единствениот удар во рамки на голот на Костадин Захов го упати во 90. минута.
Одлична партија во црвено-црниот дрес прикажа Бесарт Ибраими кој дури четири пати ја тресеше мрежата на Пол Харисон. Серијата голови на „Телеком арена“ ја отвори Изаир Емини во 14. минута по што на сцена стапи повремениот македонски репрезентативец. Првиот од своите покер погодоци против велшкиот ривал го реализира во 38. минута, а во листата на стрелци се надоврза во 53. минута, во 61. минута и во 66. минута. На теренот мина уште десетина минути по што тренерот Ќатип Османи го повлече од игра за собирање на аплаузи од трибините.
Талат Џафери и Али Ахмети во ложата на Северна трибина
Мечот меѓу Шкендија и ТНС се играше во амбиент што е под очекуваниот од аспект на бројноста на гледачите. Ги имаше околу 4.000 на „Телеком арена“ од кои најголем дел на Северната трибина, на спротивната неколку стотици и група од околу 300 „балисти“ на Источната трибина.
Во свечената ложа на Северната трибина беше присутен спонзорот на Шкендија, Лазим Дестани во друштво на претседателот на македонскиот парламент, Талат Џафери, првиот човек на Демократската унија за интеграција, Али Ахмети и почесниот претседател на тетовските „црвено-црни“, Абдулменаф Беџети.