Прва победа во сезоната на Шкендија, трета на Вардар, трет пораз во низа на Работнички и „пет од пет“ на домашните екипи. Ова се карактеристиките на петтото коло во домашниот фудбалски шампионат по кој Академија Пандев и Македонија Ѓ.П. остануваат единствени непоразени во конкуренцијата чиј, пак, нов фенерџија е тимот на Работнички.
Шкендија на „Еколог арена“ во Тетово го совлада Работнички со 3:0 и ги испрати дебармаалци на дното на табелата. Серијата голови за шампионот под Шара ја отвори Стенио Жуниор во 19. минута, на 2:0 зголеми Арменд Алими во 37. минута, а печат на премиерните три бода во првенството стави Енур Тотре во 90. минута.
Вардар со идентичен резултат ја совлада Струга Трим Лум со таа разлика што скопските „црвено-црнит“ се „разбудија“ во последната третина од средбата. Двоен стрелец за составот на Александар Васоски беше Бразилецот Жунињо во 59. минута и во 67. минута, потписник на третиот беше Даниел Аврамовски во 80. минута.
Борец поведе, па застана на гостувањето во Ѓорче Петров. Екипата на Македонија на крајот триумфира со 3:1 со погодоците на Бразилецот Паду во 39. минута, на Дејан Блажевски во 72. минута и на Бенјамин Демир во втората минута од екстра времето.
Само еден гол беше доволен за тимот на Шкупи за победа над Силекс. Единствениот гол на Чаир го постигна бразилскиот напаѓач Сержињо во 58. минута. Кратовци го заврши мечот со играч помалку, во продолжението „поцрвене“ Даниел Карчески.
Во увертирата на петтата рунда, Академија Пандев ја порази Ренова со 2:0. Марко Рајковиќ ја најави четвртата победа во сезоната на струмичани што ја потврди Марио Крстовски во 87. минута.
Прва лига, 5 коло
Шкендија – Работнички 3:0
Вардар – Струга Трим Лум 3:0
Македонија Ѓ.П. – Борец 3:1
Шкупи – Силекс 1:0
Академија Пандев – Ренова 2:0
Табела: Академија Пандев 13, Македонија Ѓорче Петров 11, Вардар 10, Шкупи 8, Ренова 7, Струга Трим Лум 7, Борец 4, Шкендија 4, Силекс 3, Работнички 3.
Идно коло: Струга Трим Лум – Академија Пандев, Работнички – Македонија Ѓ.П., Шкупи – Вардар, Ренова – Шкендија, Силекс – Борец