Пред да биде убиен, словачкиот истражувачки новинар работел на приказна за поврзаноста помеѓу политичарите и италијанската мафија, јавуваат медиумите од Братислава, известувајќи за убиството на својот колега, вториот репортер кој е ликвидиран во ЕУ во последните пет месеци.
Словачката полиција ги истражува можните странски врски на новинарот Јан Кучијак и е во контакт со безбедносните служби на Чешка и Италија, изјави шефот на полицијата Тибор Гашпар.
Гашпар кажа дека од понеделникот полицијата испрашала околу 20 лица и работи на различни теории.
Кучијак (27) и неговата девојка беа убиени во нивната куќа во место близу Братислава. Шефот на полицијата веднаш соопштил дел злосторството најверојатно е поврзано со истражувачката работа на Кучијак, додека премиерот Роберт Фицо истакна дека, доколку навистина станува збор за одмазда поради неговата новинарска професија, тоа е напад без преседан за слободата на печатот и демократијата во Словачка.
Додека претседателот на владата нуди награда од милион евра за информации за убиството, списанието „Сме“ јавува дека Кучијак непосредно пред убиството собирал материјали за врските помеѓу мафијата од Калабрија (Ндрагета) и блиските соработници на Фицо, меѓу кои и Марија Трошкова. Таа, како што се наведува, основала фирма со бизнисмен кој работи со Ндрангета.
Кучијак е долгогодишен истражувачки новинар, чие убиство ја потресе медиумската јавност ширум Европа.