Европската фудбалска асоцијација (УЕФА) објави листа на најуспешните клубови на сите времиња во Лигата на шампиони (ЛШ) и во поранешниот Куп на европски шампиони (КЕШ). Опфатени се 500 екипи, а убедлив лидер е Реал Мадрид со 550 бода (за победа два бода, за реми бод) пред Баерн Минхен со 429 и Барселона со 399. Во топ 10 се и Манчестер јунајтед (354 бода), Милан (314), Јувентус (303), Бенфика (269), Порто (254), Арсенал (245) и Ливерпул (241).
„Кралевите“ се лидери и на листата што се однесува само на Лигата на шампиони со 319 бода пред Барселона со 314 и Баерн Минхен со 284. Шпанските великани учествувале по 21 сезона во елитното натпреварување, Манчестер јунајтед и Баерн Минхен по 20, Арсенал 19.
Клуб што најдобро котира од Македонија е Вардар на 174 место со 13 бода. „Црвено-црните“ имаат седум учества и 20 одиграни натпревари. Во нив забележале три победи, 7 реми и 10 порази со гол разлика 24:34.
Најдобро рангирана екипа од регионот е Црвена звезда на 27 место со 134 бода (гол разлика 223:144) пред Динамо Загреб кој е 30-ти со 115 бода (гол разлика 165:169) и Партизан на 37 место со 102 бода (гол разлика 156:128).