Кардиф ќе мора да плати околу шест милиони евра на Нант за трансферот на трагично починатиот аргентински фудбалер, Емилијано Сала. Вака гласи одлуката на Светската фудбалска асоцијација (ФИФА) против која двата клуба имаат рок од 10 дена за поднесување на жалба.
Од ФИФА наведуваат дека „во ниту еден момент при носење на одлуката не била занемарена специфичноста на случајот и единственоста на трагичниот настан“.
Емилијано Сала го загуби животот во авионската несреќа на 21 јануари, на пат од Нант кон Кардиф каде требаше да се приклучи на истоимениот клуб од Велс. Неговиот трансфер од францускиот прволигаш изнесуваше 15 милиони евра, а сега со одлуката на ФИФА, Велшаните ќе мора да ја платат првата рата од околу шест милиони евра.