Украина и Русија денеска спроведоа нова размена на воени заробеници, во рамки на договорот постигнат во Истанбул претходно овој месец.
Денеска се враќаат војници од армијата, Националната гарда и граничната служба“, објави украинскиот претседател Володимир Зеленски на „Телеграм“, додавајќи дека повеќето од нив биле заробени уште од почетокот на инвазијата во 2022 година.
Руското Министерство за одбрана ја потврди размената, која според двете страни се случила на границата меѓу Белорусија и Украина. Ниту една страна не прецизираше бројки.
Според договорот од Истанбул, страните се согласија на размена на затвореници под 25 години, како и на тешко болни и ранети. Оттогаш, се реализирани седум размени на заробеници. Рускиот претседател Владимир Путин изјави дека досега биле разменети над 900 лица.