Published: Monday, May 26, 2025 09:45
Украинските власти утрово соопштија за нова, трета последователна ноќ на масовни руски воздушни напади со употреба на големи групи борбени дронови, пренесе ДПА.
Воздухопловните сили на Украина преку Телеграм предупредија и на нови напади со крстосувачки ракети, а воздушна тревога беше прогласена низ целата земја.
Противвоздушната одбрана била активирана на повеќе локации, а регистрирани се бројни експлозии, соопштија властите.
Според украинските воздухопловни сили, руски дронови го нападнале црноморското пристаниште Одеса.
Воената управа на Харков соопшти дека во градот се слушнала серија силни експлозии. Гувернерот Олег Синегубов напиша на Телеграм дека се работи за интензивни напади врз инфраструктура.