Унгарската влада понудила помош за Фудбалскиот сојуз на Косово околу изградбата на национален стадион, пишуваат медиумите во регионот.
Премиерот Виктор Орбан изразил подготвеност за финансирање на арена во Приштина по примерот на националниот стадион во Будимпешта кој е изграден за 16 месеци.
Ова доаѓа по објавената фотографија на Твитер на косовскиот фудбалер Редон Бејта кој по првенствен меч за играчи до 21 година го напушта теренот во кал од глава до пети. Под неа е напишана порака за помош од УЕФА.
„Ова е Редон Бејта, еден од најталентираните косовски фудбалери по натпревар од нашето првенство за играчи до 21 година. Ова е доказ за состојбата на нашата инфраструктура. Потребна ни е помош“, стои под фотографијата.
Европската фудбалска федерација сè уште не е произнесена по ова прашање. Но, затоа се произнесе унгарската влада од каде порачуваат дека стадионот би бил готов за една година. Унгарците, како што се наведува во текстот, ветиле дека нема да наплатат камата.
Стадионот во Приштина е веќе во фаза на изградба. Доколку Косоварите ја прифатат помошта од Унгарија, тогаш новата национална арена би имала капациттет од 25.000 седишта.