Министерството за надворешни работи на Унгарија, во изјава за Радио Слободна Европа, потврди дека поранешниот македонски премиер Никола Груевски го поднел барањето за политички азил во нејзината амбасада во Тирана. Властите во Будимпешта притоа истакнаа дека немаат информација за начинот на кој Груевски ја напуштил Македонија, но нагласија дека во земјата влегол во согласност со националните и меѓународни правила и прописи.

Барањето за азил на Груевски, според унгарското министерство, не е политичко туку правно прашање, но оттаму порачуваат дека немаат информација дали Груевски користел дипломатски возила на Унгарија при трансфер во земјата.

Тамошните институции не располагаат со официјални податоци преку кој граничен премин и од која земја влегол Груевски во Унгарија ниту, пак, знаат каде се наоѓа во моментот.

Груевски беше осуден на двегодишна затворска казна во случајот „Тенк“ поради неправилности при набавката на блиндираниот Мерцедес за потребите на Владата.