Ковид-19 за девет месеци во оваа година во САД „однесе“ повеќе човечки животи одошто беше случај во цела 2020 година. Од 1 јануари се пријавени над 353.000 смртни случаи од ковид-19 или околу 1.000 повеќе од ланските 352.000 за првите 10 месеци од пандемијата, покажуваат податоците на Универзитетот „Џонс Хопкинс“.

Според медицински експерти, постојат клучни разлики меѓу двете години што би можеле да ја објаснат разликата.

Професорката на Меѓународниот универзитет во Флорида и претседателка на Одделот за епидемиологија, докторка Мери Џо Трепка за „Њујорк Дејли Њуз“ изјави дека многу позаразната Делта варијанта го зголемила бројот на случаи, правејќи ги кумулативните збирови многу повисоки. Тоа е надополнето со недостиг на имунитет на стадо поради ниското ниво на вакцинација.

Многу луѓе беа изложени во услови на немање имунитет на стадо и присуство на делта варијантата која е многу позаразна, рече Трепка за „Дејли Њуз“.

Покрај тоа, додаде таа, масовна вакцинација немаше до пролетта, а најголемиот пораст во оваа година беше во јануари, по празниците. Исто така, за разлика од 2020 година, оваа година немаше строго заклучување.

„Коронавирусот не знае која година е, истакна доктор Дејвид Доуди, вонреден професор по епидемиологија на Блумберг школата за јавно здравје на „Џонс Хопкинс“. „И смртта во голема мера дојде во бранови“.