Кривичниот совет на Одделението за гонење организиран криминал и корупција при Основниот суд Скопје 1 ја прифати гаранцијата во недвижен имот на обвинетиот Душко Лазаров екс началник во одделението за Јавен ред и мир за настаните во Собранието од 27 април и му го укина притворот. Судот на Лазаров му определи мерки за претпазливост, привремено одземање на патната исправа и обврска на обвинетиот да се јавува кај службено лице во Судот.
За обвинетиот Митко Пешов, поранешен началник на одделението за специјални полициски операции, Судот не го прифати предлогот за укинување на мерката притвор и замена за куќен притвор со прифаќање гаранција.
„Кривичниот совет на Одделението за гонење организиран криминал и корупција при Основниот суд Скопје 1, постапувајќи по предлог на одбраната на Д.Л. и М.П. опфатени со обвинителниот акт поврзан со настаните од 27 април 2017 година во Собранието на Република Македонија за укинување на мерката притвор, Советот донесе решение со кое за обвинетиот Д.Л. го прифати предлогот за определување мерка за обезбедување присуство – гаранција со кое решение по правосилноста и запишување на гаранцијата во катастар, мерката притвор се укинува, а дополнително се определуваат и мерки за претпазливост, односно привремено одземање на патнатата и друга исправа за преминување на државната граница и обврска на обвинетиот да се јавува на службено лице во Судот“ соопштија од Кривичниот суд.
Против овие решенија странките имаат право на жалба преку Кривичниот суд до скопскиот Апелациски суд.
Пред два дена од притвор беше пуштен и поранешниот министер за внатрешни работи Митко Чавков, кој понуди гаранција во недвижен имот од 600 000 евра.
На 20 април од притвор излегоа и Горан Ѓошевски поранешниот шеф на обезбедување на Трајко Вељаноски и Оливер Поповски од МВР, кои исто така понудија гаранција и на кои им беа одредени мерки на претпазливост. Од притвор излезе и обвинетиот Захарие Симовски, на кого судот му одреди куќен притвор.