Еврокомесарот за проширување, Оливер Вархеји, пред Европскиот Парламент денеска изјави дека преговарачките рамки на ЕУ со Албанија и со Северна Македонија оваа недела ќе бидат поднесени до земјите членки на ЕУ, јави дописничката на МИА од Брисел.
Вархеји се обрати на пленарната седница на Европскиот Парламент во врска со извештајот за Западен Балкан. Тој истакна дека Европската Комисија (ЕК) го врати регионот во срцето на Европа во првите шест месеци од оваа година и дека ветувањата кон регионот се претворија од зборови во дела.
„Комисијата доби задача да изготви преговарачки рамки за Северна Македонија и за Албанија што ќе бидат готови веќе оваа недела, заедно со преглед на реформскиот напредок“, потврди Вархеји.
Преговарачките рамки беа ветени во текот на јуни, додека пак редовните извештаи за напредокот на сите земји од регионот се одложени за наесен, кога ЕК треба да понуди и голем економски и инвестициски план за излез од кризата на регионот. Вархеји истакна дека е испорачано и во однос на ветувањата кон земјите членки на ЕУ со ревидираната преговарачка методологија која овозможи конечно зелено светло за преговорите со Скопје и со Тирана во март годинава, по повеќе месеци блокада од Франција.
„Процесот на проширување е заснован на заслуга, за да напредуваат на патот кон ЕУ, земјите од Западниот Балкан треба да продолжат да испорачуваат реформи, посебно во делот на владеењето на правото, борбата против корупцијата и организираниот криминал, темелните вредности и човековите права“, рече еврокомесарот и додаде дека што побргу една земја напредува реформски, толку побргу се приближува до членство во Унијата.