Лидерот на СДСМ и премиер Зоран Заев и претседателот на опозициската ВМРО-ДПМНЕ Христијан Мицкоски денеска во Собранието на лидерска средба ќе се обидат да најдат решение за разликите за Законот за јавно обвинителство, со кој се решава и судбината на Специјалното јавно обвинителство.
Лидерската средба е закажана за 20 часот и ќе се одржи во формат еден плус четири.
Од ВМРО -ДПМНЕ го потврдија одржувањето на лидерската, но нагласија дека освен за Законот за јавно обвинителство, тема ќе бидат и предвремените избори. Од партијата велат дека темата предвремени избори биле услов за одржување на лидерската.
Од Владата за МИА велат дека главна тема е Законот, а за тоа дали ќе се разговара за предвремени ќе се види на самото место.
Заев во пораката за Денот на независноста меѓу другото изрази и увереност дека земјата има капацитет со двотретинско мнозинство да го донесе и Законот за јавно обвинителство.
– Сите случаи и евентуални случаи на криминал и корупција, како во развиените земји, мора да добијат ефикасна, праведна и правична разврска. Тоа го очекуваат граѓаните и со тоа ќе дадеме дополнителни аргументи на ЕУ, дека сме и ние цврсто определени кон правдата и изградбата правна држава, истакна премиерот.
Поради скратените рокови Законот за Јавно обвинителство се очекува да биде донесен најдоцна до 15 септември. За да биде усвоен потребно е двотретинско мнозинство од пратениците, а неговото носење е клучно и за евроинтеграциите на земјава.
Последната средба на работните групи на власта и опозицијата за законот, која се одржа минатата недела не вроди со суштествен заклучок, а сега се очекува решението да се бара на лидерската средба.
Јавното обвинителство во петокот го прифати барањето на специјалната јавна обвинителка во оставка Катица Јанева да ги преземе предметите на СЈО.
Примопредавањето на предметите од СЈО во државното јавно обвинителство, како што најави државниот јавен обвинител Љубомир Јовески ќе се врши предмет по предмет. Тој не очекува процесот да трае долго и дека Обвинителството има капацитет да ги преземе и да постаува соодветно по предметите.
Калајџиев: СДСМ и ВМРО ДПМНЕ треба да кажат зошто не договорија наследник на Јанева
Камбовски: СЈО ја одигра својата улога, предметите сега треба да преминат во Обвинителството