Француската кандидатка за претседател и членка на екстремната десница, Мари Ле Пен вети дека ќе ги укине сите субвенции за обновлива енергија и ќе ги урне турбините на ветар во Франција, доколку биде избрана за претседател следната година.
Ветерната и соларната енергија не се обновливи. Тие се наизменични. Ако бидам избрана а претседател, ќе ставам крај на целата изградба на нови фарми со ветерници и ќе започнам голем проект за нивно демонтирање, рече Ле Пен за радио РТЛ.
Таа додаде дека ќе ги укине субвенциите за енергија од ветар и сонце, кои, според неа, изнесуваат шест или седум милијарди евра годишно, што претставува тежок товар за сметките за електрична енергија на потрошувачите.
Ле Пен вети дека ќе обезбеди силна поддршка за француската нуклеарна индустрија, дозволувајќи изградба на неколку нови нуклеарни реактори, финансирање на голема модернизација на постојната француска флота и поддршка на изградба на мали модуларни реактори како што предложи претседателот Емануел Макрон, пренесува „Танјуг“.
Во „Стратегијата за француската економија 2030“ што беше презентирана оваа недела, Макрон предложи милијарди евра поддршка за електрични возила, за нуклеарна индустрија и за зелен водород – произведен од нуклеарна енергија, но малку спомена за обновливата енергија.
Франција произведува околу 75 проценти од својата енергија во нуклеарни централи, што значи дека нејзиното производство на електрична енергија е меѓу најниските емисии на јаглерод диоксид по глава на жител во која било од развиените економии. Сепак, заостанува далеку зад Германија и другите европски земји во однос на инвестициите во ветар и соларна енергија.