Вицепремиерот за економски прашања Фатмир Битиќи денеска престојува во посета на Црна Гора , каде низ средби со државно-владиното раководство се разговара за интензивирање на соработката со акцент на економската и можноста за поголемо учество на Црногорските инвестиции на Македонскиот пазар.

-Црна Гора и Северна Македонија имаат завидни односи и тоа е добра предиспозиција за нивно повеќестрано динамизирање, особено во делот со економски предзнак. Зборувавме за економското и регионалното поврзување, и мој став е дека треба да се поддржат сите регионални иницијативи, но мора да разбереме дека регионалната соработка е политичко а за жал не е економско прашање. Црна Гора треба да додаде гас во евроинтеграциите но тоа не значи дека треба да се биде надвор од регионалните интеграции, кои никако не можат да се замена за ЕУ, изјави потпретседателот на црногорската влада Дритан Абазовиќ.

Од своја страна вицепремиерот Битиќи посочи дека низ реагионалната соработка треба да се поврзат економиите кои се сите мали и како такви неатрактивни за странските вложувања.

– Регионот на Западен Балкан има одлична шанса да ги искористи своите предности во овој пост ковид период и да се постави на светската мапа како мирен и стабилен регион, во кој сите соработуваме и споделуваме исти-демократски вредности. Треба да прераснеме во пример за конкурентен регион кој константно го зголемува својот удел во светската економија и кој ќе биде атрактивен за инвеститорите, изјави вицепремиерот Битиќи.

Абазовиќ на крај констатира дека интензивираните средби на претставниците меѓу двете земји како и добрите односи и вибрации можеби би можело да покренат еден поширок бран за разбивање на бариерите за бизнисот.