Министерот за здравство Венко Филипче изрази сочувство до семејствата на загинатите пациенти во модуларната болница во Тетово.
– Ова е тажен ден за нашата земја и огромна трагедија којашто не потресе сите нас. Изразувам најдлабоко сочувство до семејствата на жртвите на оваа несреќа. Длабоко не потресе она што се случи во Тетово и од вчера и во текот на целата ноќ целокупните капацитети на министерството и на сите други институции се целосно мобилизирани за што побрзо да се утврдат причините за оваа трагедија, изјави министерот Филипче.
За модуларните болници Филипче рече дека се запазени сите стандарди. Истрагата ќе утврди дали по предавање на објектот за користење, тој бил одржуван.
– Апсолутно мислам дека модуларните болници се безбедни, изјави на прес-конференцијата министерот Венко Филипче, нагласувајќи дека поради тоа се спасиле 12 пациенти во синоќешниот пожар во тетовската модуларна болница.
Сите инсталации во модуларните болници, појасни Филипче, се присутни во сертификатите за квалитет, огноотпорност, атестите, како од страна на производителите, така и од страна на контролата. Буквално, како што рече, секое едно парче што таму е вградено.
– Апсолутно, начинот на кој што се направени ковид-болниците, меѓу останатото мислејќи и на евакуцијата, со широки коридори и ниски прозори, благодарение на тоа и се спасиле 12 пациенти, така да во тој дел, мислам дека апсолутно нема некаков ризик, додаде министерот.