Мерките што доследно ги спроведуваме, засега го даваат посакуваниот резултат. Клучната цел ни беше бројката на заразени да расте линеарно, а не експоненцијално и да не ни се случи сценарио од Италија каде здравствениот систем не можеше да ја издржи таа оптовареност. Многу беше важен тајмингот на имплементација на мерките. Ние, на пример, бевме прва земја во регион от што воведе контрола на аеродромите во момент кога тоа не беше направено во метрополи како Истанбул и Брисел. Се покажа дека рестриктивните мерки, социјалната дистанца, ограничувањето на движењата на двете групи помлади и повозрасни лица, едните да се движат допладне, а другите попладне, даваат резултати, рече министерот за здравство, Венко Филипче во вечерашното интервју на Нова ТВ.
Притоа тој нагласи дека тековните мерки ќе траат најмалку до крајот на април, а дали ќе бидат поригорозни или, пак, ќе се попушта во однос на забраната на движење, ќе покажат анализите на состојбата.
„Секоја земја има автетентичен пристап во однос на развлекување на кривата. Колективниот имунитет е, исто така, во моментот непознаница. Тој ќе се случи или можеби веќе се случува, но борбата ќе заврши кога ќе имаме ваквина. Мислењето на СЗО е дека кривата треба да се развлече, да се игра како што велат топло- ладно. Кога кривата расте да се заоструваат мерките, кога опаѓа да се попушта во однос на рестрикциите. Внимателно ќе се следи ситуацијата и во иднина може да бидат потребни рестриктивни мерки во одреддени региони, доколку, на пример, се појави можност за втора крива, како во случајот сега во Кина, која деновиве огранични влез на странци од одредени држави“, изјави Филипче.
Во разговорот тој нагласи дека вирусот треба сериозно да се сфати и дека не може да се споредува со сезонски грип, освен во случаи на полесна клиничка слика.
„Укажувањата на колегите од Италија, таму работат и наши лекари, се дека над 50 отсто од пациентите што се приклучени на респираторна машина не преживуваат и им се случува распаѓање на повеќе витални органи, а не само на белите дробови. Имаме докази во светот, особено во северна Италија каде и млади лица, сосема здрави, завршуваат фатално, без оглед што навреме се јавиле на лекар. Сите треба да бидат внимателни, иако во повеќето случаи заболените имаат полесна клиничка слика и го минуваат вирусот како лесна настинка“, истакна министерот за здравство.
Во односот на дилемите и различните толкувања околу употребата на маски, Филипче рече дека се придржуваат до ставот на Светската здравстена организација (СЗО) дека вирусот не останува во воздухот и затоа на отворено, кога луѓето не се во поголеми групи, луѓето не треба да носат маски. Кога, пак, се во затворен простор, со повеќе лица, се препорачува носење на маска бидејќи вирусот се пренесува преку капките од уста. Тој ја отфрли можноста за тестирање по случаен избор, како што најавија некои земји, како на пример, Норвешка и Австрија.