Снимката која беше објавена е направена пред четири години од Александар Верушевски на ручек во ресторан во Струмица, одговори лидерот на СДСМ, Зоран Заев на денешната прес-конференција на прашање на новинар за тоа кој е другиот соговорник.
„Тој е мој пријател, но ете така одлучил така направил. Неговиот татко знаете е советник за национална безбедност и ми е голем пријател. Но, ете, Александар така одлучил така правел“, рече Заев.
https://www.facebook.com/zaevzoran/videos/530514801188448/
Во однос на изборите, тој истакна дека во случај да нема консензус за изборите, тогаш датумот за нивно одржување по Устав и закон е 21 јуни.
„Ако не успееме да се договориме, не е прашање на тоа што бараат политичките партии, што бара опозицијата, туку тогаш ќе постапиме според Устав и закон. Ние нема да дозволиме да се кршат Уставот и законите. Треба да се договориме, но ако не се договориме, да знаат сите дека на 21 јуни ќе има избори со 14 кандидадски листи, ќе се излезе на гласање и верувам дека максимален ќе биде бројот на излезени гласачи“, рече Заев.
Заев на прес-конференцијата говореше и за третиот пакет економски мерки вреден 355 милиони евра, при што нагласи дека во носењето се водело сметка да се помогне на секое лице. Со тоа, вкупниот државен влог во амортизација на ударите од ковид-19 врз македонската економија и граѓаните ќе достигне над пола милијарда евра.
„Горд сум дека нашата држава стоечки одговори на оваа криза. Да ја претвориме оваа криза во нова можност. За трите сет на мерки ќе се вложат 550 милиони евра, истакна Заев.
Со платежните картички, вели тој, ќе се стимулира потрошувачката на граѓаните. Ќе има и ваучери за одмор во вредност од 6.000 денари.
На прашањето дали со картичките ќе може да се плати на пазарите, Заев објасни дека дека голем дел од пазарџиите кои се фискализирани и државата е подготвена да помогне.
„Оваа картичка ќе се користи само за дома. Значи можете да купите облека, бела техника, се што е домашно производство“, изјави на прес-конферецијата преседателот на СДСМ.