Published: Friday, April 10, 2020 15:45
Владата на Република Северна Македонија категорично демантира дека е донесена Уредба со која финансиски ќе се помагаат МПЦ и ИВЗ. Таквите наслови што се објавија во некои медиуми и што се шират на социјалните мрежи од „Илинденска ББ“ ги оценуваат како дезинформација.
„Вистина е дека Владата на својата 38 седница донесе одлука за одобрување наменски средства на Универзитетот на Југоисточна Европа во Тетово, на Православниот богословски факултет „Св. Климент Охридски“ – Скопје, придружна членка на Универзитет „Св. Кирил и Методиј“ – Скопје, како и на Факултетот за исламски науки – Скопје за реализирање на студиските програми на овие три институции за 2020 година“, се вели во соопштението на Владата.
Во владиниот допис до медиумите се нагласува дека средствата определени со оваа одлука се исклучиво за реализирање на студиските програми на овие три институции и тоа согласно претходна одлука на Владата од деветтата седница одржана на 16 февруари оваа година, а со цел да се обезбеди редовно и непречено функционирање на студиските програми за 2020 година (https://vlada.mk/node/20260), а не за финансиска помош за МПЦ и ИВЗ како што пренесуваат медиумите.
„Одлуката за одобрување на наменски средства за Универзитетот на Југоисточна Европа во Тетово, на Православниот богословски факултет „Св. Климент Охридски“ – Скопје придружна членка на Универзитет „Св. Кирил и Методиј“ – Скопје, како и на Факултет за исламски науки – Скопје за реализирање на студиските програми на овие три институции за 2020 година, е донесена врз основа на Законот за високото образование донесен во 2008 годиан со кој овие институции се стекнаа со статус на приватно-јавни непрофитни високообразовни установи“, потенцираат од Владата.
Согласно овој Закон, средствата за финансирање на дејноста на Универзитетот на Југоисточна Европа во Тетово, на Православниот богословски факултет и на Факултетот за исламски науки, се обезбедуваат покрај од средствата на основачите и од Буџетот на Република Северна Македонија, како и од други извори определени со закон, се вели од владиното соопштение.