Без разлика на капацитетот на кафулињата и кафеаните и присутни гости во објетот, сите ќе мора да бидат вакцинирани или да прележале Ковид – 19 во изминатите 45 дена. Угостителските објекти со капацитет поголем од 30 гости ќе мора да ангажираат редарска служба за да контролираат дали гостите имаат соодветен сертификат и дали е валиден, а во угостителските објекти со помал капацитет проверките ќе ги прават оние кои работат во него. Овие мерки стапуваат на сила од утре.
Владата на денешната седница ги донесе најновите мерки, протоколи препораки за заштита на здравјето на населението од Ковид – 19, врз основа на препораките од Комисијата за заразни болести. Како што соопштија од Владата, донесена е одлука дека за влез во угостителски објекти, кафулиња и барови, без разлика на капацитетот и бројот на присутни посетители/гости/лица, како и за настан од секаков вид (прослава, веселба, свадба, роденден, крштевка, концерт, семинар, обука, работилница, конференција, културен или спортски настан, обложувалници, казина), задолжително е поседување, приложување и проверка на еден од следните документи:
– сертификат/потврда за извршена имунизација (вакцинација) од вирусот SARS-CoV-2, односно примена најмалку прва доза вакцина против заразната болест КОВИД – 19 или
– сертификат/потврда за прележан КОВИД – 19 во последните 45 дена, сметајќи од денот на оздравувањето, за лица над 18-годишна возраст.
– Оваа мерка задолжително се применува и за организација, работа и присуство/учество и на секаков вид на настан на отворен простор, каде има повеќе, како и за влез во затворениот дел од моловите. Дополнително, во сите угостителски објекти, кафулиња и барови опфатени со оваа мерка каде капацитетот е поголем од 30 посетители/гости/лица, задолжителнo e воспоставување редарска служба од страна на правниот субјект за контрола и спроведување на мерката. Додека пак во угостителските објекти со капацитет помал од 30 лица контролата на поседувањето на Ковид – 19 сертификатот на посетителите е должност на редовно вработените лица, соопштија од Владата.
Мерките стапуваат на сила од утре.
Од Владата потсетуваат дека останува забраната за организација на свадби, веселби и прослави во објекти од затворен тип, додека друг тип на настани на затворено и натаму може да се организираат со исполнетост до 30% од капацитетот на местото каде што се одржува настанот и ограничен број на посетители до максимум 1.000 посетители со задолжително поседување, приложување и проверка на еден од задолжителните Ковид – 19 документи.