Православниот богословски факулет (МПЦ) и Факултетот за исламски науки (ИВЗ), со одлука на Влада, ќе добијат 120.000 евра од државниот Буџет. Дознаката за трансфер на средствата е насловена „за реализација на студиски програми за 2020 година“ и одобрена е преку вонредните владини мерки за амортизирање на финансискиот удар од корона-кризата на што се пожалија претставници на двете најголеми верски заедници во земјата во изминатите денови.

Ваквата одлука на Владата е објавена во завчерашниот број на „Службен весник“. Четири и пол милиони денари или околу 73.000 евра ќе одат „за реализација на студиската програма“ на Православниот богословски факултет, а три милиони денари или околу 49.000 евра за истата намена ќе завршат кај Факултетот за исламски науки – Скопје.

Наменски средства во висина од десет и пол милиони денари или околу 170.000 евра ќе бидат насочени и кон Универзитетот на Југоисточна Европа – Тетово.

Поглаварот на Исламската Верска Заедница, реисот Сулејман Реџепи за време на гостување на гостиварската ТВ „Глоби“ на 6 април рече дека ИВЗ е во криза поради актуелната состојба со коронавирусот при што истакна дека е побарана помош од Владата.

„Јас го побарав нашиот дел. Владата да биде внимателна што прави. Имаме повратен одговор во кој се вели дека барањето е прифатено и дека е испратено на разгледување во секторот за финансии на Министерство за економија. Побарав од генералниот секретарот Мирсад Јакупи да контактира со Бујар Османи, кој е член на кризниот штаб и вицепремиер, дали има нешто? – Тој вели дека нема ништо досега. Ќе ги потсетам малку поинаку, со писмо, затоа што не дај Боже ние да ги суспендираме одлуките, нема сила што ќе може да се бори против епидемијата, ви гарантирам, тогаш тука ќе стане Бангладеш“, рече Реџепи во емисијата на ТВ „Глоби“.

Со реакција дека и Македонската Православна Црква е погодена од корона-кризата се јави и митрополитот на дебарско-кичевската Епархија, владиката Тимотеј. Неговото образложение е дека, речиси, пола од приходите на манастирите и црквите доаѓаат за Велигден што оваа година ќе се одбележува на поинаков начин за разлика од изминатите години поради вонредната состојба во државата, владините мерки за ограничување на движењето на граѓаните во борбата за спречување на ширењето на коронавирусот и придржувањето до препораките да нема масовни собири, со тоа и литургии.