Владата размислува за ребаланс на буџетот, кој, како што изјави премиерот Зоран Заев на денешната прес-конференција очекува да се случи кон средината на годината.

-Ребалансот на Буџетот не е нова работа. Секоја година се прави. Ние би правеле и 4 и 5 пати само да ги зголемиме капиталните инвестиции, само за да биде ефикасен буџетот до крај, и да стигнат овие пари на граѓаните до што поголем број на граѓани. Преку компаниите, преку капиталните проекции, преку социјалните политики, преку здравствените политики и така натаму. Веројатно околу средината на годината ќе отпочнеме некои постапки. Немаме отпочнато ребаланс, но не значи дека не размислуваме. Гледаме при проекциите каде остануваат резерви. Проекциите се дека можеме да очекуваме 25 милиони евра заштеди, рече Заев, одговарајќи на новинарско прашање.

Тој, додаде дека овие заштедени средства Владата планира да ги алоцира во програма за канализација и водоводи, детски градинки и училишта, но како што нагласи, последниот збор ќе го каже министерот за финансии.

На прашање за намалувањето на проекциите за економски раст, од страна на Светска Банка и ММФ, премиерот изјави дека таквите прогнози се резултат од зимскиот период, кој како што рече, „остава впечаток на ниско ниво на реализација на капиталните инвестиции“.

-Тоа секогаш се случувало. Зимата се користи за подготовка на проектите, на плановите, за сè. Јас верувам дека ако успееме 65 отсто да реализираме од тоа што сме планирале, дека ќе го постигнеме растот од 3,2 отсто. Знаете дека мојата амбиција е 4 отсто. Може Македонија да го достигне тоа. Тоа не зависи само од нас, зависи многу и од општините, да издаваат одобренија за градба, но да не биде тоа изнасилено градење, како што зборуваат граѓаните, рече Заев.

Целта на Владата е до крајот на мандатот да се постигне раст на економијата од пет проценти.