Специјалната јавна обвинителка, Катица Јанева, денеска по завршениот претрес во кандецалеријата на поранешниот претседател на Кривичниот суд, Владимир Панчевски, рече дека се работи за предистражна постапка за оддавање службена тајна, но и за злоупотреби на АКМИС системот преку кој се врши распределба на судските предмети.
“Со наредба од судот ги одземавме сите податоци од компјутерскиот систем за распоредување на предмети. Едната предистражна постапка е поврзана со друг предмет кој произлегува од прислушуваните разговори”, рече Јанева.
Како што рече Јанева, лицата биле цел на оперативно следење и се поврзани со предмет кој произлегува од друга постапка на СЈО. Таа рече дека претреси се вршат и во канцелариите на информатичарите во судот и во семејни домови на информатичарите и на Панчевски. Одговарајќи на новинарско прашање, Јанева рече дека се спмневале дека се местеле предмети и дека издавале податоци за лица поврзани со случаи на СЈО. Таа не сакаше да открие за кои лица станува збор и дека тоа ќе го откријат во понатамошната постапка.
Панчевски во изминатава година и половина, откако беше формирано Специјалното јавно обвинителство, постојано е прозиван дека е извршител на нарачките на власта и кочничар за случаите кои ги отвори СЈО.
Од судот на чие чело е тој се одбиваа речиси сите барања за мерки за претпазливост, притвор, увид во предмети, налози за претрес, изземање на судии кои ги доставува Катица Јанева. И постојано излегува со соопштенија со политички квалификации за неговите колеги од СЈО, кои ги обвинува дека се нестручни и тенденциозни.
Владимир Панчевски од 2003-2008 година работи во Министерството за финансии, во одделот на финансиска полиција. Неговото прво вработување во Кривичниот суд е од 2008 година каде што една година работи како истражен судија. Со доаѓањето на Лидија Неделковска за Претседателка во Кривичниот суд, Панчевски е прераспореден во Одделот за организиран криминал и му се доделени дел од најзначајните предмети од организиран криминал. Постапува во повторената постапка за случајот „Армиско оружје“, како и случајот „Пепел“ 2 во кој му се судеше на кумановскиот тутунски бос Бајруш Сејдиу.
Панчевски си замина со службено возило од службениот влез на судот без да одговори на прашања на новинарите.