ВМРО-ДПМНЕ бара од Амбасадата на САД јавно да каже дали е против идејата на партијата да се одржат нови избори.
– Еден ден откако ВМРО-ДПМНЕ јавно се произнесе дека ситуацијата во Македонија е зрела за нови избори, Амбасадата на САД во одговор на новинарско прашање ги повика партиите да ги продолжат разговорите за формирање на нова Влада. Одговорот на новинарското прашање следеше откако не беше постигнат договор за формирање на Влада во уставниот рок и СДСМ излезе со став дека треба да го добијат мандатот, иако тоа не е предвидено со Уставот.
– ВМРО-ДПМНЕ бара појаснување дали нивната позиција значи дека САД сугерираат и бараат од Република Македонија и од партиите во парламентот да нема нови предвремени парламентарни избори и дали овој повик може да се толкува како официјален став на новата администрација во САД, се вели меѓу другото во соопштението на ВМРО-ДПМНЕ.
Оттаму велат прашањето го поставуваат јавно бидејки ставот на Амбасадата бил изнесен јавно и создал конфузија при неговата интерпретација во јавноста.
– ВМРО-ДПМНЕ како партија под чие водство Македонија потпиша декларацијата за стратешко партнерство со САД во 2008 година останува на позициите дека двете земји треба да ја продолжат соработкта во духот на таа декларација, потенцира партијата на Никола Груевски.