Реагирајќи на денешната прес-коференција на лидерот на опозицијата, Зоран Заев, владејачката ВМРО-ДПМНЕ смета дека одбивањето на СДСМ да учествува во расправата за донесување на измени на Законот за помилување, било ново бегство на Зоран Заев од одговорноста и излегување на површина на лицемерието дека наводно се залагал за укинување на аболициите.

– Зоран Заев досега не побара да му биде укината аболицијата за „Глобал“, случај во кој што истиот се товари дека незаконски се стекнал со 8 милиони евра. Измените во Законот што ги предлага ВМРО-ДПМНЕ и ДУИ нудат токму таква можност, да биде повлечена аболицијата на Зоран Заев и државата да ги врати осумте милиони евра за кои е оштетена во случајот „Глобал“, се вели во реакцијата на ВМРО-ДПМНЕ.

Заев, денеска одговарајќи на новинарско прашање дали би сакал да се повлече аболицијата за него, дадена од екс-претседателот Бранко Црвенковски за случајот „Глобал“, рече дека повлекување на таа одлука бара уште од 2008.

А според најголемата партија на власт, изминативе шест месеци јавноста била сведок на деструкцијата на СДСМ откако влезе во институциите.

– Шест месеци партиските кадри на СДСМ не реализираа ниту еден позитивен проект од полза на граѓаните. Шест месеци само ги блокираа веќе отпочнатите проекти и работеа на ангажирање на партиските послушници на високи позиции во позиции во министерствата кои ги раководеа. Владата беше дисфункционална, потенцира ВМРО-ДПМНЕ.

Според партијата со која раководи поранешниот премиер Никола Груевски, не постои ниту една единствена разумна причина зошто мнозинството пратеници во Собранието не би ги прифатиле оставките на партиските кадри на Зоран Заев.

– СДСМ и Зораз Заев избегаа и од изборно соочување на 5.јуни покажувајќи дека се смртно преплашени од фактот дека народот ја прочита нивната деструкција и ќе ги казни на избори. Со тоа не постои ниту едно образложение зошто кадрите на СДСМ би останале во Влада, во ситуација кога нивниот лидер не е подготвен да излезе на изборно соочување, се вели во реакцијата.