Катица Јанева и Специјалното јавно обвинителство се претворија во карикатура, заради понизноста во извршувањето на политичките нарачки, стои во реакцијата на опозициската ВМРО-ДПМНЕ на денешната прес-конфереција на СЈО, за отворените три нови истраги, во кои меѓу осомничените се екс лидерот и премиер, Никола груевски, пратеникот Антонио Милошоски и Миле Јанакиески, поранешен министер за транспорт и врски.
„Во ситуација кога економијата е пред колапс, а владата на Заев е целосно неспособна да ги испорача ветувањата со кои ги манипулираа граѓаните, сосем е очекувано повторно да се активира СЈО чиј мандат за отворање истраги и обвиненија истече уште во јуни минатата година“, стои во соопштението.
Поради ова, велат од опозициската партија, Јанева и СЈО продолжуваат политички да конструираат случаи без никаква правна основа.
„Јавноста мора да биде дефокусирана од целиот хаос што се случува во државата. Затоа се отвораат случаи за договори потпишани од Амбасадорот на ЕУ во Скопје или закони изгласани во Собранието. Паниката во која што се наоѓа СДСМ не може да биде оправдување за несериозното и незаконско постапување. Правната држава ќе се врати откако ќе си замине оваа неспособна власт“, се додава во соопштениото на ВМРО-ДПМНЕ.
СЈО денеска отвори три нови истраги со кодни имиња „Попис“, „Моќник“ и „Актор“.
Првата – „Попис“ се однесува на стопирањето на пописот на населението во 2011 година во кој осомничени се Никола Груевски и лидерот на ДУИ, Али Ахмети. „Моќник“ е за лустрацијата на кичевски судија поврзана со продажба на државно земјиште, каде првоосомничен е пратеникот Антонио Милошоски, додека третата е за изградбата на автоматот Демир Капија – Смоквица. Груевски и Јанакиески во овој случај се осомничени за злоупотреби при доделувањето на тендерот за изградба на автопатот на грчката фирма „Актор“.