Коментирајќи ја посетата на претседателот на Европската Комисија во Македонија, ВМРО-ДПМНЕ преку соопштение до јавноста го прашува премиерот Зоран Заев дали Жан-Клод Јункер го информирал за „политичката тортура која се спроведува во државата, неоснованите притвори и монтираната истрага против десетина лица за тероризам“.
Потенцирајќи дека ВМРО-ДПМНЕ е силно посветена на европската интеграција на државата, партијата тврди дека Заев и СДСМ не можеле да зборуваат за реофрми кога, според нив, ни 50 отсто од Планот 3-6-9 не бил исплонет.
„ВМРО-ДПМНЕ останува силно на заложбите за демократска Република Македонија во која принципот на владеење на правото ќе се почитува од сите институции. Дејствијата на власта и нејзината досегашна работа не се во согласност со европските вредности. СДСМ и Зоран Заев не можат да зборуваат за реформи, кога по 9 месеци немаат реализирано, ни 50% од планот 3-6-9. Наместо посветеност на реформските процеси, власта се насочи кон креирање на штетни договори, неуставни закони и расипничко трошење на парите на граѓаните“, се вели во соопштението на ВМРО-ДПМНЕ.
Според најголемата опозициска партија, Заев требали да го информира својот соговорник дека Република Македонија е единствената држава на тлото на Европа во која имало политички затвореници.
„Дали Заев го информираше господинот Јункер, дека во Република Македонија сопственици на медиуми се осудуваат на затвор заради новинарски текстови? Јавноста се прашува дали Заев го запозна својот соговорник со непотизмот кој царува во неговата влада и институциите со кои раководат кадри на СДСМ. СДСМ и Заев со своето дејствување ја загрозуваат демократијата и правната држава. Декларативните заложби за демократија не се доволни. Република Македонија има потреба од слободна држава во која владеењето на правото е единствен принцип по кој се водат сите“, тврди ВМРО-ДПМНЕ.
На денешната заедничка прес-конференција, по тет-а-тет средбата и билатералната средба на делегациите, претседателот на ЕК, Јункер, меѓу другото, упати силни пофалби за Заев, кој рече дека и ја поправил репутацијата на Македонија надвор, а некои од реформите кои ги спровела Владата го зачудиле светот.