ВМРО-ДПМНЕ најави дека ќе поднесе интерпелација и кривична пријава против Талат Џафери, бидејќи, како што соопштија од опозициската партија ја узурпирал функцијата претседател на Собранието на Република Македонија потенцира и за флагрантно кршење на правниот поредок на државата.
-Владејачкото мнозинство на сила и без почитување на правото на амандманска расправа го донесе неуставниот закон за двојазичност, кршејќи го Уставот, законот и Деловникот на Собранието на Република Македонија. Со овој неуставен, неприменлив и штетен закон, без постоење на реална потреба се наметнува двојазичноста на целата територија на Република Македонија. Со овој закон се предвидува и двојазичност на парите, ковани и книжни, но и на униформите на полицијата, пожарникарите и здравствените работници. Овој закон е во целосна спротивност со Уставот и амандманите 5 и 8 од истиот. Овој закон ја загрозува унитарноста на државата и единството на полицијата, како орган, изјави на прес конференција Орце Георгиевски, член на ИК на ВМРО ДПМНЕ.
Тој повтори дека ВМРО-ДПМНЕ не го признава овој закон и никогаш нема да го признае, а чекорот на претседателот Иванов да не го потпишува указот на законот за двојазичност го оцени како државнички потег и единствено очекуван потег кога се крши Уставот и се дерогира правото.