Опозициската ВМРО ДПМНЕ денеска преку соопштение најави дека продолжува со протестите против притворањето на пратениците од редовите на оваа партија и на нивни поддржувачи и членови, во врска со истрагата за насилствата во Собранието на 27 април.
Од 15 до 17 часот ќе бидат блокирани крстосниците:
– Крстосницата кај „Мавровка“;
– Крстосницата помеѓу улиците „Васил Чакаларов“ и „Ангел Динев“ во Карпош;
– Крстосницата кај „Рампа“ во населбата Кисела Вода.
Од партијата најавуваат дека денеска во 18 часот ќе одржат протест пред Министерството за правда.
-Хунтата на Зоран Заев, која ја зароби Република Македонија, вчера ја погреба демократијата и правната држава.Република Македонија повеќе не е демократска држава. Република Македонија под водство на СДСМ е единствената земја во Европа каде пратеници се притвораат во судски монтиран случај, се вели во реакцијата на вчерашната судска одлука за притвор и домашен притвор за шестмината пратеници.
Од партијата истакнуваат дека притворите за пратениците Жаклина Пешевска, Крсто Мукоски, Љубен Арнаудов, Сашо Василевски, Јохан Тарчуловски и Љупчо Димовски се целосно неосновани, исто како што е неосновано обвинението за тероризам кое им се става на товар, ним и на лицата поврзани со настаните од 27-ми април. Случајот кој се води против 36-мината недолжни граѓани е чист политички прогон, кој не се заснова на правото и законите, туку на заканите и потребите на хунтата, велат од ВМРО ДПМНЕ и најавуваат дека протестите ќе продолжат.