Во сенка на незапамтени пожари на источниот брег, загаден воздух, високи температури, но и поројни дождови, ноќеска ќе стартува првиот гренслем во 2020 година – Австралија опен. Во фокусот, логично се бранителите на титулата, Србинот Новак Ѓоковиќ кој ќе се обиде по осми пат да замине од Мелбурн со највредниот чек, и младата Јапонка Наоми Осака. Вниманието, пред се, ќе биде насочено кон машкиот турнир на кој конкуренцијата е поизострена, со Рафаел Надал, со Роџер Федерер, но и поради Доминик Тим, Стефанос Циципас и Данил Медведев кои се поопасно се приближуваат на моќната тројка.
Прв ривал на Ѓоковиќ е Германецот Јан Ленард Штруф (37-ми на АТП листата) против кого ќе игра по третпат во кариерата. Претходните два меча ги реши во своја корист – во Доха во 2017 година со 7:6, 6:3 и во ланското осминафинале на Ролан Гарос со 6:3, 6:2, 6:2. Евентуален триумф на српскиот ас ќе биде јубилеен 900- во неговата кариера со кој ќе се израмни со пензионираниот Џими Конорс, Роџер Федерер, Рафаел Налад, Иван Лендл и Гилјермо Вилјас.
Федерер во првото коло ќе игра со Американецот Стив Џонсон (81-ви на АТП листата), а Надал ќе почне во Мелбурн со дуел против 26 годишниот Уго Делиен од Боливија.
Осака ќе почне со мисијата за одбрана на тронот против Мери Бузкова од Чешка додека, нормално, интерес привлекува и Серена Вилијамс која на стартот ќе игра со Русинката Анастасија Потапова.
Вкупниот награден фонд на турнирот е рекорден 71 милион долари, што е за 13,6 отсто повеќе од лани. Победниците во поединечна конкуренција ќе заработат по 4,12 милиони долари, поразените во финналните мечеви во сингл ќе понесат по 2,065 милиони, полуфиналистите ќе добијат 1,065 милиони, четврт-финалето „тежи“ 525.000 долари, итн. Паричната премија за шампионите во игра на двојки е 760.000 долари додека најдобриот тандем во микс дубл ќе освои 190.000 долари.