Еден од најтешко погодените градови од земјотресот беше турскиот град Газиантеп. Овој турски град, кој се наоѓа на 80 километри од епицентарот на земјотресот во Кахраманмараш, остана уништен. Меѓу зградите кои се урнаа беше и замокот Газиантеп стар 2.000 години. Овој историски замок бил изграден во вториот и третиот век од нашата ера за време на Римската империја.
Турската новинска агенција Анадолу објави дека „некои од ѕидовите во источните, јужните и југоисточните делови на историскиот замок Газиантеп во централната област Шахинбеј се уништени во земјотресот, а остатоците се расфрлани на патот“.
Анадолија понатаму наведува дека дел од железните огради на замокот биле расфрлани по тротоарите и дека на потпорните ѕидови се појавиле големи пукнатини.
Разорниот земјотрес предизвика и голема загриженост за културното наследство во погодените области.
Фотографиите од Газиантеп го покажуваат замокот кој се распаѓа, кој беше популарна туристичка дестинација во која се наоѓаше панорамскиот музеј на одбраната и херојството на Газиантеп.
Замокот, кој бил проширен за време на Отоманската империја, не бил единственото културно место оштетено од оваа природна катастрофа. Погодена е и блиската џамија Ширвани. Во оваа џамија од 17 век, источниот ѕид и куполата се урнале поради земјотресот.
Во меѓувреме, во Сирија од земјотресот беше оштетен и историскиот град Алепо.
Државниот завод за антиквитети потврди дека е погодена античката градска цитадела. Се урнале делови од османлиската воденица во внатрешноста на цитаделата, а делови од одбранбените ѕидини се срушиле и пукнале. Дополнително, бил оштетен и влезот во цитаделата, а се урнала и куполата на едно од минарињата на џамијата Ајубид – која се наоѓа во внатрешноста на тврдината.
Како што продолжуваат спасувачките напори, отежнати од лошите временски услови, Светската здравствена организација предупреди дека бројот на загинати може да се зголеми.
Во 1999 година, во земјотрес со јачина од 7,4 степени според Рихтер во близина на Истанбул загинаа 17.000 луѓе, а последиците од сегашниот земјотрес однесоа повеќе од 35.000 животи и сè уште предизвикуваат голема загриженост.
Турција се наоѓа на анадолскиот расцеп, што ја прави една од најранливите области за активни земјотреси. Милиони живеат во областа, во која исто така се бележи зголемување на бројот на Сиријци кои бегаат од граѓанската војна во нивната земја.
Извор: Н1