Тимот на Хилари Клинтон ги обвини руските агенти кои пробиле во мејловите на Демократската партија, дека се обидуваат да му помогнат на републиканецот Доналд Трамп. Дали навистина постојат некакви врски помеѓу Трамп и Москва?, анализира Си-Ен-Ен.

Неколку експерти го покренаа прашањето за врските на бизнисменот со Русија, поради стравувањето дека Москва може да се вмеша во изборите во САД. Рускиот министер за надворешни работи, Сергеј Лавров, силно ги отфрли обвиненијата дека Русија била вмешана со хакирањето на мејловите.

Која е врската помеѓу Трамп и Русија?

Пробивањето на мејловите

Иако беше предвидено Демократската конвенција да биде знак на единство, по тоа што се случи со мејловите на Демократскиот Национален Комитет, настана хаос во Филаделфија.

Репортер за Њу Јорк Тајмс известува: „Истражувачите заклучија дека врз Националниот комитет била извршена повреда од страна на двајца руски разузнавачки агенти”.

Според Дејли Бист: „Ова е операција за која неколку американски официјални лица се сомневаат дека е намерен обид за да се влијае врз претседателските избори во прилог на Доналд Трамп”.

Трамп и неговите помошници негираа било каква поврзаност и велат дека нема никакви докази кои го поврзуваат Трамп со случајот.

– Про-Путин персонал

Пол Манафорт, претседателот на кампањата на Трамп, има поминато децении како политички советник во Источна Европа. Манафорт бил близок соработник на поранешниот украински министер за надворешни работи, Виктор Јанукович, кој беше тргнат од власт во 2014та и е добро познат на јавноста како сојузник на Владимир Путин.

Според Џош Маршал, еден од најзвучните новинари кои ги истражуваат руските врски на Трамп, неговиот советник за надворешни работи, Картер Пејџ, има длабоки и долгогодишни финансиски врски со Газпорм, руска енергетска компанија вредна трилиони долари.

„Не е претерано да се каже дека не можеш да бидеш вмешан во Газпром на толку високо ниво како Пејџ, без да бидеш во целосна усогласеност со политиката на Путин”, пишува Маршал.

Но како критички одговор на Маршал, авторот Џефри Кар, дава забелешка дека Пејџ го напушти Газпром во 2007 и оттогаш прави многу малку пари преку Русија.

– Промени во Републиканскиот манифест

Републиканскиот Национален Комитет го смени својот став кој го имаше кон Русија под притисок од страна на тимот на Трамп, пред  конгресот во Кливленд минатата недела.

Еден делегат предложи амандман кој повикува САД во источна Украина да обезбеди “смртоносно дефанзивно оружје” во нивната борба против бунтовниците кои се подржани од Русија во тој регион.

Според Вашингтон Пост, сојузниците на Трамп притискаат да се ослабне изјавата. Ова беше единствената суштинска промена која ја побара тимот на Трамп и дојде откако тој за Њу Јорк Тајмс изјави дека можеби нема да ги почитува обврските на НАТО дека Русија треба да направи инвазија на Балтичките земји.

Сепак, Вашингтон Пост исто така вели дека таквата позиција, додека надвор од чекор со основните постулати на републиканците, не е нечуена во Вашингтон:

Претседателот Обама одлучи да не дава одобрување (за праќање на смртоносно дефанзивно оружје во Украина)и покрај препораките да го направи тоа, од страна на неговите врвни Европски функционери во Стејт департментот и војската.

– Финансиски врски

Трамп веќе подолго време не соработува со многу американски банки. Наместо тоа, Маршал вели “тој ја зацврстува и повторно ја гради својата финансиска империја со силна потпора на капиталот од Русија”.

Ова вклучува и “финансирање од страна на сомнителни извори во Русија и Казахстан”, според тужба откриена од страна на Њу Јорк Тајмс. Трамп, самиот изјави дека има “ нула инвестиции” во Русија.

Како што Џулиа Иофе пишува, многу странски компании отворија свои бизниси во Русија, само Трамп не успеа да направи значителен бизнис во земјата.

„Фактот дека Трамп, после многу обиди и со добри намери кон државата, не беше способен да изгради ништо во Русија – кога Риз Картлон и Кемпински и Радисон и Хилтон и било кој од западните хотелски синџири, беа во можност- зборува за неговиот недостаток на врски со влијателни руси“, пишува таа.

Не е невообичаено за компании за недвижен имот да добијат значителен руски бизнис, па така нема докази дека политичките ставови на Трамп се купени.

„Само затоа што финансиерите можеби ќе сакаат да влијаат врз моќните луѓе, не значи дека тие ќе успеат во тоа”, пишува Даниел Дрензер за Вашингтон Пост.

– Броманса

Путин го нарече Трамп “паметен и многу талентиран”. Трамп говореше со восхит во повеќе пригоди за политичката сила на Путин.

„Тоа што го имаме е еден вид на “броманса” која се случува помеѓу Владимир Путин и Трамп”, вели Џон Подеста, советник на Клинтон, одговарајќи за скандалот со мејловите, забележувајќи дека нема познати врски помеѓу нив двајца.

Претседателот Барак Обама за Ен Би Си кажа дека тој не знае дали хакирањето дошло од Русија но додаде: „Тоа што јас го знам е дека Доналд Трамп постојано го покажува својот восхит кон Путин”.

Иофе смета дека на Кремљ не му се допаѓа Клинтон и во Трамп, како кандидат за претседател, гледа подобар сојузник за нивните интереси.

Но, тоа не значи дека Трамп е во “врскa’’ со Путин. Не е недозволено да се зборува блескаво за американски противник, или пак да се имаат слични политички вредности.

Судејќи по последните анкети, по се изгледа тоа не е толку важно ни за американските гласачи.