Премиерот на Србија, Александар Вучиќ, допатува во Москва, каде утре ќе има средба со претседателот на Русија, Владимир Путин.
Посетата ќе се случи во очи на претседателските избори во Србија закажани за 2 април, на кои Вучиќ е кандидат.
Во делегацијата на Вучиќ се министрите за одбрана и економија, Зоран Ѓорѓевиќ и Александар Вулин.
Вучиќ изјави дека теми на разговор ќе биде економијата, воено-техничката соработка, како и соработката во областа на туризмот.
Тој нагласи дека со Путин ќе разговара во „четири очи“ и дека делегацијата на Србија, ќе одржи посебен состанок со претставниците на руската влада.
„Прва тема е нашата економска соработка, бидејќи поради падот на рубљата и цената на нафтата и гасот, дојде до пад на нашата стокова размена. Ќе разговараме за преработка на овошје и зеленчук, за „Агрокор“, чиј газда станува „Сбернака“, за можна соработка во наменска индустрија во која користиме шасии од КАМАЗ“, изјави премиерот Вучиќ.
Во однос на воено-техничката соработка Вучиќ рече дека очекуваат финализација на тој дел на соработката, бидејќи на Србија не и била доволна само полициска заштита на небото и затоа ќе разговарале за набавка на противавионски системи.
Вучиќ последен пат бил во Москва во неофицијална посета, на крајот на минатата година, кога разговараше со министерот за одбрана на Русија и потоа изјави дека е договорена испорака на шест авиони од типот „МИГ 29“, 30 тенкови и други оклопни возила.