Српскиот министер за одбрана Александар Вулин преку државниот канал „Русија 24“, при посетата на Москва, порача дека „светот нема да ја сопре несреќата на Балканот доколку допушти создавање на Голема Албанија“. Тој оцени дека сите Албанци, со исклучок на две општини во Србија, се наоѓаат во единствено политичко – безбедносно опкружување на НАТО.
„Кога Северна Македонија ќе стане членка на НАТО, а тоа се очекува веќе оваа година, сите Албанци ќе живеат во единствено политичко и безбедносно опкружување. Тие бараат формализација на нивната територија преку граници. Сите земји молчат. Црна Гора многу често ја напаѓа Србија, но не и „Голема Албанија” иако таа сака да земе дел од нејзината територија. И Северна Македонија многу често ќе ја напаѓа Србија. Го призна Косово без било какви проблеми, а половина од нејзината територија е на патот на „Големата Албанија”. Сите молчат, само Србија зборува“, рече Вулин.
Тој оцени дека и покрај тоа што во Србија нема консензус за Косово, нејзин интерес е да ги заштити Србите на Косово.
„Ако сакаат да го решат албанското национално прашање, и Србите ќе го решат своето национално прашање. Ние немаме втор пат. Значи, кога зборувате за Косово, не го одвојувајте од целината на српското прашање. Ние мора да го решиме целосно српското национално прашање, вклучувајќи го и Косово, а не без него. Претставниците на меѓународната заедница мора да имаат разбирање за српските проблеми“, посочи Вулин.
Според него, додека Србите се на Косово, може нешто да се направи.
„Она што ни е многу важно, дека големите и моќни земји како Русија, мораат да препознаат дека се создава „Голема Албанија“, рече Вулин и додаде дека Србија никогаш нема да влезе во НАТО дури и да остане последна земја во Европа додека „претседателот Александар Вучиќ е врховен командант на српските вооружени сили и додека тој е министер за одбрана”.
Српскиот министер за одбрана Александар Вулин, на покана на рускиот колега Сергеј Шојгу, во Москва учествуваше на Осмата конференција за безбедност.