Авиони со македонски државјани од Виена и од Базел за денеска се најавени да слетаат на Меѓународниот аеродром во Скопје. Ноќеска по полноќ се очекуваше и авион од Бон со 180 лица кои се пријавија за хуманитарните летови за враќање во земјата поради светската пандемија на коронавирус. Согласно протоколите за државни карантини, граѓаните ќе се упатат во хотел „Дрим“ во Струга, каде што ќе поминат 14 дена во изолација.
Вчера со авион од Берлин беа вратени 176 лица од кои 173 возрасни и три дечиња. Министерот за надворешни работи Никола Димитров на фејсбук информира дека во летот на „Визер“ кон Германија беа однесени и странски државјани од Скопје.
„Во соработка со странските претставништва кај нас, помагаме при репатријацијата во нивните татковини: Австрија, САД, Австралија, Чешка, Холандија, Малезија, Словачка, Унгарија, итн. Таква соработка и солидарност ќе има и на летовите кон Виена и Базел по кои ќе испратиме странски државјани, а дома ќе вратиме македонски“, напиша Димитров.