ВМРО-ДПМНЕ соопшти дека одлуките на ДИК да се одбијат приговорите на најголемата опозициска партија за изборни нерегуларности, ќе ги обжали пред Управниот суд.
– ДИК стана соучесник во сето ова, занемарувајќи и релативизирајќи очевидни факти и докази, со што се стави во функција на прикривање на изборните криминали на СДС. ВМРО-ДПМНЕ за сите претставки упатени до ДИК, а одбиени од истата, ќе го искористи правото на жалба пред Управниот суд. ВМРО-ДПМНЕ нема да дозволи некој да ја уништува демократијата и правната држава во Република Македонија, се вели во соопштението на партијата.
ВМРО-ДПМНЕ воедно ги повикува ОБСЕ и ОДИХР да ги нотираат „очевидните криминали“, да застанат на страна на демократијата, правото на глас и слободата како врвни вредности на цивилизираниот свет, да ги осудат и санкционираат „ваквите криминали“.
Партијата тврди дека СДСМ ги организирала најнедемократските избори во историјата на независна Македонија, а целата изборна кампања, според партијата која ја води Никола Груевски, поминала во светло на изборен поткуп, уцена и закани врз гласачите, додека во текот на изборниот ден беше спроведен т.н. бугарски воз, со што кутиите беа полнети со гласачки ливчиња однапред заокружени за СДС.
– ВМРО-ДПМНЕ дополнително ги уверува сите прекршители на законите, кои со цел да се додворат на врхушката на власт вршат изборни криминали и редица други прекршоци дека со враќањето на демократијата и правната држава ќе одговараат за криминалот и штетата нанесена врз граѓаните и државата, се дополнува во соопштението.