Јапонија во неделата, за првпат по 15 месеци, не забележа ниту еден смртен случај од ковид-19, јавија јапонските медиуми. Претходно, според националната телевизија НХК, немаше ден без смртни случаи од ковид-19 од 2 август во 2020 година.
Бројот на новозаразени и смртни случаи од ковид-19 во земјата се намали драстично, со оглед дека над 70 проценти од населението се вакцинираше.
Бројот на нови инфекции го достигна врвот во август, кога имаше над 25.000 дневно, како резултат на брзото ширење на Делта варијантата на вирусот.
Од почетокот на пандемијата, во Јапонија починаа над 18.000 лица од ковид-19.
За да се спречи можен нов бран на ширење на вирусот во текот на зимата, Владата планира да започне со дополнителна вакцина во текот на наредниот месец и работи на обезбедување третман за лекување базиран на таблети за поблаги случаи на болеста за да ги намали хоспитализирањата.