Претседателот на Владата на Република Северна Македонија, Зоран Заев заедно со своето семејство го дочека Христовото воскресение во црквата „Свети Григориј Палама и Димитриј“ во Струмица.
„Честитки за најголемиот христијански празник, Христовото воскресение – Велигден до сите христијански верници кои го празнуваат. Воскресението Христово ја симболизира победата на животот над смртта и дава сила во надежта за излез од сите тешки ситуации со коишто се соочуваме сите ние. Верувам дека овој празник ќе ни донесе мир, благосостојба и меѓусебно почитување на сите“, се вели во честитката на премиерот Заев.
Претседателот Ѓорѓе Иванов за време на велигденските празници е во Охрид и заедно со семејството присуствуваше на утринската свечена богослужба во црквата „Свети Ѓорѓија“.
„Од ова наше најсвето место, од нашиот православен Ерусалим, на сите верници им го честитам овој голем христијански празник Велигден. Посакувам во текот на целата година сите граѓани да бидат сплотени и заедно да ги пребродат сите предизвици со кои се соочуваат во животот“, рече Иванов.
Лидерот на ВМРО ДПМНЕ, Христијан Мицкоски остана во Скопје и заедно со сопругата го дочека Христовото Воскресение во црквата „Свети Апостоли Петар и Павле“ во Ѓорче Петров.
„На сите православни верници им го честитам празникот Воскресение Христово, Велигден со желби за многу здравје, благодет, среќа и љубов. Овој голем ден и сите останати да ги минуваме со добра мисла, заедништво, подадена рака и пример како со взаемно почитување можеме да создадеме подобро утре за нашите деца и идните поколенија“, порача меѓудругото Мицкоски.
Христовото Воскресение во Скопје го дочека и претседателскиот кандидат на опозицијата, Гордана Сиљановска-Давкова која беше во црквата „Света Петка“ во Црниче додека кандидатот за претседател на власта, Стево Пендаровски за Велигден престојува во Галичник заедно со семејството.