Лидерите на СДСМ, Зоран Заев и на ВМРО-ДПМНЕ, Христијан Мицкоски се наоѓаат во задолжителна домашна изолација. Од двајцата е земен примерок за тестирање на коронавирус, при што резултатот на Мицкоски е негативен, додека од тестот на Заев се чекаат резултати што ќе бидат познати во текот на денот.
Ова го соопшти министерот за здравство Венко Филипче на вонредното обраќање од Владата претпладнево кој додаде дека тестовите кај нив се направени по информацијата дека ТВ новинар кој имал интервјуа со нив во текот на минатата недела е позитивен на коронавирусот.
„Лидерите на двете најголеми политички парти, Зоран Заев и Христијан Мицкоски од денеска се наоѓаат во задолжителна домашна изолација. По информацијата што ја доби Министерството за здравство дека еден новинар од телевизиски медиум е позитивен на ковид-19, кој во текот на минатата недела имаше интервјуа со лидерите на ВМРО-ДПМНЕ и на СДСМ, и Мицкоски и Заев се тестирани на коронавирусот. Резултатот на Христијан Мицкоски кој беше изработен доцна синоќа е негативен Тестот на Христијан Мицкоски е негативен, но тој ќе биде во задолжителна самоизолација до истекот на 14 ден од последниот контакт со заболениот и во овој момент нема потреба од посебни епидемиолошки анкети. Резултатот на претседателот на СДСМ, Зоран Заев, со оглед на тоа дека тој синоќа веќе беше заминат за Струмица, ќе биде готов во текот на денешниот ден, но и тој веднаш по добивањето на информациите е ставен во домашна изолација. Новинарот е во стабилна здравствена состојба и во моментот е на лекување во болницата „8 септември“. Во текот на денот ќе се направат анкети и со точниот наод и бројка на лицата кои ќе одат во самоизолација, ќе еволуираат епидемиолозите“, изјави Филипче од говорницата во Владата.
Филипче најави и редовна прес-конференција во текот на денот на која ќе го соопшти резултатот од тестот на Заев и ќе ги сподели со јавноста најновите информации во врска со коронавирусот во земјава.