„Вие сте станале истражител, ги коментирате сите детали и од ракав тропате работи кои се далеку од секоја можна вистина. Но, не е мое, ниту на нас политичарите да коментираме делови од истрагата. Помина времето кога бевте и извршител и судија и обвинител“ му кажа премиерот Заев на лидерот на опозицијата Христијан Мицкоски на дуелот на ТВ Канал 5.
Тој додаде дека изградбата на модуларните болници е според закон и дека се спроведени сите правила и правни прописи.
Во еден период имавме по 750 пациенти во тие модуларни болници и тие спасија животи. Да бидете толку политички ориентирани за пуста желба за власт да ја злоупотребувате оваа страшна трагедија може само вам да ви личи, рече Заев.
Тој додаде дека е проѕирно политичкото злоупотребување на оваа трагедија од страна на ВМРО-ДПМНЕ и дека граѓаните го гледаат и препознаваат тоа.
„Болниците од модуларен тип се изградени со цел да се избегне италијанско сценарио и преполнување на болниците. Ако место споменици се правеа болници претходно, немаше да има потреба од модуларни болници“, кажа премиерот Заев.