Честитки до ракометарите на Вардар по шампионското крунисување во Келн од сите страни. Мобилните телефони „прегореа“, сандачињата се преполнети со пораки, се пишува на социјалните мрежи. Се обраќаат нивни роднини, пријатели, другари, поранешни соиграчи, навивачи, но и политичари. Лидерот на опозициската ВМРО ДМПНЕ можеше да се забележи на фотофрафии во вардаров дрес на трибините во „Ланксес арена“, а преку Фејсбук се огласи и премиерот Зоран Заев.
„Нов македонски блесок во Европа. Алал да ти е Вардаре! Победуваш и обединуваш, радост си најголема за нашиот народ. Ве чекаме во Скопје“, напиша претседателот на македонската Влада и на СДСМ.
Според информациите, сега двократниот европски ракометен владетел ќе пристигне утре околу полноќ, поточно, во 23.55 часот на Меѓународниот аеродром Скопје. Навивачите се организираат за приредување на пречек достоен за шампиони. Салата „Јане Сандански“, според некои најави, ќе биде збирно место од каде е планирано да се тргне кон аеродромот околу 22.30 часот.