Резолуцијата на ВМРО-ДПМНЕ за македонските црвени линии е неприфатлива за владеачкото мнозинство без уставното име во нејзината преамбула и содржина, а Уставот во однос на името на државата мора да се почитува, порача премиерот Заев на денешната прес-конференција во Владата.
Тој нагласи дека секаде во документот каде што се наведува името на државата, треба да стои Република Северна Македонија.
– Ако некој сака да го избегне уставното име, нека го прави тоа сам. Ние тука нема да партиципираме. Нема да го кршиме Уставот. Уставното име на државата е Република Северна Македонија. Ја поддржуваме Декларацијата на ВМРО-ДПМНЕ, ќе застанеме зад неа, на сите да им биде јасно дека сите сме застанати заедно во заштита на македонскиот јазик и идентитет, но тоа не значи дека треба да го кршиме Уставот, напомена Заев.
Први што треба да го почитуваат Уставот, дополни, се токму Парламентот, Владата, институциите и политичките партии.
– Во Резолуцијата на неколку места се споменува Република Македонија, а во Уставот е Република Северна Македонија. И во Преамбулата треба да стои Република Северна Македонија. Тоа е Устав, а не дали ние сакаме или не сакаме да биде вградено, рече премиерот.
На новинарско прашање дали е спорно тоа што опозицијата ги поднесува законите до Собранието на Република С. Македонија, Заев е дециден дека и тоа не е уставно.
– Во нашиот Устав не пишува дека ние сме Република С. Македонија. Ние сме Република Северна Македонија. Граѓаните за тоа прашање се изјаснија на референдум. Парламентот по дискусија од 130 дена, три пати гласајќи, ја донесе одлуката за нашето ново уставно име. На името Република Македонија се додаде зборчето Северна и тоа е дел од Преспанската спогодба која е закон веќе, а е дел и од Уставот. Очекувам да се почитува Уставот од страна на сите, а политичките партии треба да бидат први. Непочитувачи ако се граѓаните сигурно ќе имаат реперкусии, а политичките партии не е во ред да останат неказнети и да сносат последици зашто така им текнало, им паднало на памет да не го употреуваат уставното име, одосно да не го почитуваат Уставот, подвлече Заев.