Според лидерот на СДСМ, Зоран Заев, вчерашните контрапротести пред седиштето на партијата, се дрскост и безобразие бидејќи не му е јасно за што се протестирало пред неговата партија.
– Да дошол барем Ѓорге Иванов и овде да ја потпишел таквата глупава одлука, налудничава, надвор од Устав и закон, ај да коментираме што било, но ВМРО ДПМНЕ и `се е можно, јас верувам дека сиве овие луѓе коишто се собраа синоќа, некоi 200-300 луѓе во близина на најголемата опозициска партија, не се виновни луѓе, тоа доаѓа од налудничавите промисли на врвот на раководство на ВМРО- ДПМНЕ, изјави Заев.
Според Заев, тоа што дадени се решенија за аболицирања и се објавени во Службен весник, само по себе покажувало оркестрирана и организирана форма, којашто не е баш така како што вели Ѓорге Иванов, како чин кој самостојно го добил.
Тој ги повика сите политичари да не ја прифатат аболицијата и да ја одбијат бидејќи само на тој начин ќе има шанса за враќање на правната држава.
Воедно тој потенцираше дека никој не треба да биде надвор од законот секој којшто се огрешил пред закон да одговара, секој кој е невин да ја докаже својата невиност пред правосудните истанци.
Првиот човек од опозицијата очекува ДУИ и ДПА согласно нивните изјави, доколку не се согласуваат со одлуката на претседателот Иванов, да преземат чекори за поништување на одлуката, за отповикување на Ѓорге Иванов од функцијата претседател на државата и сите други следни чекори.
Опозицијата отворено повикува доколку Уставниот суд го укине Специјалното јавно обвинителство, граѓаните да ја земат правдата во свои раце.
– Тоа значи дека повеќе правен систем во Република Македонија не постои. Таа беше последната иституција којашто испраќаше искра надеж за враќање на правото и правната држава во Република Македонија. Тоа значи практично преземање на правните одлуки од страна на пленум граѓански, граѓаните кои најверојатно ќе изречуваат пресуди и ќе носат одлуки, рече Заев.