Првиот човек на македонската Влада, Зоран Заев денеска од Подгорица за време на Јадранската повелба изјави нашата земја интензивираше соработката со земјите во регионот, и очекува да стане 30-тата членка на НАТО.

Како што рече Заев, членството на Црна Гора во НАТО е охрабрување, бидејќи тоа покажува дека сите може да се издигнат и да придонесат за колективните потреби, но и за потребите на своите граѓани.

„Очекуваме Македонија да стане 30.членка на НАТО. Енергично работиме во регионот. Ние се отвораме кон соседите. Вчера потпишавме договор за добрососедство со Бугарија и ја интензивиравме соработката со другите земји во регионот“, потенцираше Премиерот, додавајќи дека ова се чекорите кои треба да придонесат за развој на Република Македонија и регионот.

И потпретседателот на САД, Мајк Пенс од Подгорица порача дека администрацијата на САД под раководство на претседателот Доналд Трамп, ќе продолжи со истата политика врз Западен Балкан, бидејќи, како што рече тој, иднината на регионот е во ЕУ и НАТО.