Премиерот Зоран Заев по денешното рочиште за „Поткуп“ изјави дека од денешното сведочење на единствениот сведок за обвинувањето дека барал мито можеле да се видат признанија од сведокот дека бил инструиран од МВР и ОЈО.
-Јас јавно прашав, а редот беше тој да каже дека се отворени други истраги и како тие се затворени пред тој да биде соработник на власта. Тоа требаше тој да го каже, но истрагата нека докаже како тоа се поклопува со ПИ мерките и неговото инволвирање во овој процес. Верувам дека после овие искази на сведокот треба да следуваат други пријави против службени лица за тоа како му се наредувало и објаснувано. Мојот адвокатски тим ќе одлучи како понатаму, рече Заев.
Во врска со тоа дали СЈО поседува „бомби“ во врска со овој случај, Заев рече дека има, дека ги слушнал и дека се работи за прислушувани разговори и пред и по овој перидо. Според него, овие ПИМ се нелегитимно набавени.
Претходно на рочиштето Заев му поставуваше прашања на Николов во врска со нивните средби, разговорите и директно го праша дали зел мито, на што Николов одговори со не.
Николов на прашање на судијката Добрила Кацарска која е дел од судечкиот совет, призна дека кога ја добил опремата од МВР одел кај Заев и го терал да одговара онака како што се случа на снимката од ПИМ и дека снимката од ПИ мерките што била прикажана на телевизија не била целосна.
Во сведочењето на почетокот на рочиштето, Николов рече дека кога бил во МВР да го пријави случајот се сретнал со тогашниот директор на БЈБ Митко Чавков. Во текот на сведочењето тој рече дека имал и други средби со Чавков, а со неговиот син договарал соработка за проект.
Претходно судот одлучи денеска да не биде пуштена целосната снимка од ПИМ, се додека Основното јавно обвинителство не добие писмена одлука од судот. Обвинителството побарало одлуката за објавување на снимката да ја добие на писмено, бидејќи ќе се жали на повисок суд.
Причина за тоа е затоа што станува збор за ПИ мерки и заради заштита на сведокот.
Одбраната прво побара таа да ја слушне снимката за да може подготвена да го испрашува сведокот, но барањето беше повлечено откако вториот адвокат на обвинетиот Зоран Заев кажа дека тој веќе ја имал слушнато целосната снимка.