Граѓаните за нас се граѓани и навистина адресираме исти планови, исти надежи, исти ветувања насекаде. Ако мое обраќање на сите наши трибини или било какви настапи во изминатиот период е некаде околу 30 минути, можеби две-три минути трошиме на ДУИ, но веројатно тоа минува кај луѓето заради тоа што сме сè уште актуелни коалициони партнери. Лично мислам дека е дефинитивно здраво и за државата и за ДУИ да минат во опозиција, 17 години власт е премногу долг период, особено имајќи предвид дека доаѓа време во кое што треба да работиме дома, истакна Зоран Заев вечерва на ТВ Телма.
„Се отворија процеси и против СДСМ, не само против ДУИ, има и пресуди како што има против СДСМ и против ДУИ. Бројките на почетокот од формирањето на коалицијата беа неприкосновени и како такви можете едноставно да влезете во коалиција со ДУИ и немате некоја посебна друга опција. Таа коалицијата беше изградена врз основа на вредности, на цели, на таргети. Исполнивме огромен дел од нив, навистина се донесоа сите историски одлуки, се завршија реформите во државата, условот кој што беше за добивање на одлуката за преговори, значително ја дигнавме економија, но меѓудругото видовме и слабости“, реле лидерот на владеачката партија.
Заев уште еднаш, како и претходно во кампањата, потенцира дека уцени „нема да се прифатат“, меѓутоа и дека се е отворено за разговор.
„Тие јасно испорачаа уценувачка порака. Под уцени нема да разговараме. Се е отворено за разговор и мојата желба е ДУИ да оди во опозиција. Сакам да покажам успех поради државата“, истакна претседателот на СДСМ.
На крајот на денот, додаде Заев, разбирам дека е легитимно да водат ваква политичка кампања.
„Така одлучиле, така е легитимно. Треба да прифатат дека и ние имаме легитимна кампања. За мене навистина граѓаните се граѓани без исклучок, без разлика од која етиничка припадност е. И сега ако некому паѓа тешко што таргетираме и граѓани од албанска етничка заедница, нека ми извини господинот Ахмети, но ова е иднината на државата. Ние сме мултиетничко општество, ова е единствената коалција во која стојат сите етнички заедници и тоа единство и сплотеност е гаранцијата за успех во иднина“, вели Заев.