Лидерот на СДСМ, Зоран Заев утре ќе ги поднесе потписите кај Претседателот, Ѓорѓе Иванов, и од него ќе побара мандат за формирање нова влада.
„Следува период каде ќе се посветиме на поставување на квалитетна владина програма која ќе ја реализираат одговорни политичари, кои ќе водат реална политика, таква каква што избраа граѓаните на Македонија“, рекоа од СДСМ по изборот на Заев за мандатар за состав на влада.
Партијата на Ахмети му даде поддршка на лидерот на СДСМ во потписи од десет пратеници, но се уште нема одлука од ДУИ дали ќе партиципира во власта. Засега се во игра две опции: Учество во влада со договор за коалицирање или преминување во опозиција со поддршка на малцинска влада.
Лидерот на СДСМ ги доби и потписите од Беса и од Алијансата за Албанците. Зијадин Села, пред почетокот на седницата на Централното претседателство на партијата, за Алсат М рече дека тие се подготвени да бидат дел од владата, но ако бидат прифатени точките од заедничката платформа на партиите на Албанците.
“Нашето учество во владата е условено со нашата заедничка политичка платформа. Реално, каква смисла би имале изборите и владата ако ние станеме дел од една влада каде ќе се спроведуваат платформи и програми на други партии. Еден од главните услови е законот за албанскиот јазик, расветлување на монтираните политички случаи, декриминализација на институциите и општеството и се разбира, економскиот развој, за да се спречи големото иселување на населението од Македонија. Значи, ние нема да влеземе во влада за да бидеме само како кукли, туку ќе влеземе тогаш кога ќе се исполнат поставените услови“, рече Села.