Премиерот Зоран Заев во изјава за агенцијата Франс прес изрази уверување дека земјата никогаш не била поблиску до постигнување на решение за спорот со Грција околу името.
Тој, во изјавата што ја пренесува МИА, додава дека евентуалниот неуспех „не би значел крај на светот“.
– Верувам дека никогаш не сме имале подобри околности за постигнување целосно решение, кое ќе трае засекогаш, нагласи Заев, додавајќи дека доколку „спорот не се реши, тоа нема да значи крај на светот“.
Премиерот Заев истакна дека Македонија ќе ја продолжи „европската програма на овој или на оној начин“.
Тој изјави дека голем дел од спорот околу името на Македонија е решен, но не сака да открие детали од преговорите, бидејќи „тоа може да го загрози процесот“.
Македонија неделава од Европската комисија доби чиста, неусловена препораки за отворање пристапни преговори за членство во Европската Унија.
Во извештајот земјава доби голем плус за добрососедските односи, договорот со Бугарија но проблемот со името, велат од ЕК, мора итно да се реши.
Македонскиот премиер денеска на прес-конференција во Владата рече дека фокусот е ставен на решение за името, а не на рокови.
– Сега е вистинскиот момент да се најде решение. Влегуваме во самата суштина, во најсуптилните детали каде мора да бидеме креативни за да може двете страни да ги заштитиме, изјави Заев.
Тој истакна дека дека е многу важно процесот да биде решен пред да се одлучува за датумот за отпочнување на преговорите со ЕУ.
– Мислам дека сега е вистинскиот момент да се најде решение каде сите партиципиенти во државата би застанале заедно зад нешто што е согласно сочувувањето на нашето достоинство и нашиот идентитет, а водејќи грижа и за достоинството на грчката страна, рече премиерот.
В среда, на 25 април ќе се одржи нова средба на шефовите на дипломатиите на Македонија и на Грција, Никола Димитров и Никос Коѕијас со медијаторот Метју Нимиц во Виена.
Инаку, грчката страна останува цврста на ставот дека договорот за името ќе биде постигнат само ако Скопје се согласи да го смени Уставот. Заменик-министерот за надворешни работи на Грција, Јоргос Катругалос, рече дека решавањето на спорот зависи од македонската страна.
„Ние сакаме комплетно решение да не создадеме нов проблем во следната деценија. Сакаме решение кое ќе има карактеристики на трајност, па затоа е неопходно да се промени Уставот. Доколку другата страна одговори на ова, ќе има договор, а ако не, тогаш договор нема да има. Јасно е. Топката е на нивна страна“, рече Јоргос Катругалос, заменик-министер за надворешни работи на Грција.