Комисијата за европски прашања на која се расправа за Законот за употреба на јазиците, продолжи со образложението на министерот за правда Билен Саљији околу тоа зошто е потребно унапредувањето на користењето на јазиците во државните институции и тела, но “дебатата“ помеѓу пратениците Антонијо Милошоски од ВМРО-ДПМНЕ и Џеват Адеми од ДУИ засега е единствената расправа внатре во комисијата.
Милошоски неколкупати во својот говор како координатор на пратеничка група, имајќи 30 минути на говорницата, ги повтори ставовите дека предлог-законот за кој се разговара всушност е политички договор на владината коалиција и без аргументи се носи по брза постапка под превезот на европското знаменце.
„Предлог-законот е противуставен и се работи за предизборен политички договор. Ако беше регуларен немаше за него да се разговара со европско знаменце туку ќе се носеше по регуларна постапка. Дали воопшти ги поканивте на дебата за да го кажат своето мислење Симона Грујовска – Маџовска или Александра Ѓуркова од Институтот за македонски јазик. Дали воопшти ги поканивте за овој предлог-закон мислење да дадат професорите Силјановска, Ќулавкова, Ванковска да го кажат своето мислење“, ги предупреди Милошоски своите колеги кои доаѓаат од Велес, Штип, Радовиш, Кавадарци, алудирајќи дека овој Закон за употреба на јазиците е дискриминирачки кон другите етнички заедници.
„Овој предлог-закон слободно може да се нарече „Закон за употреба на албанскиот јазик“, иако граѓанинот Албанец нема да добие ништо повеќе во Кичево, Тетово или Струга со носењето на овој закон“, потенцираше тој.
ЏЕВАТ АДЕМИ: ДУИ НАСТРАДА НА ПАРЛАМЕНТАРНИТЕ ИЗБОРИ ПОРАДИ КОАЛИЦИРАЊЕТО СО ВМРО-ДПМНЕ
По говорот на Милошоски, за реплика се јави пратеникот од ДУИ, Џеват Адеми, кој се обрати на македонски јазик, потенцирајќи му на Милошоски дека нему не му пречи македонскиот јазик како што на Милошоски му пречи албанскиот поради вредносниот систем кој го имал.
„Употребата на албанскиот јазик по овој закон, не е против македонскиот, туку само им помага на Албанците да ги остварат своите загарантирани права“, рече Адеми, кој потенцираше дека Владата имала смелост и храброст што го предлагала овој закон како дополнување за имплементација на Охридскиот рамковен договор.
По ова, Милошоски му одговори на Адеми дека неговиот интерес (на Џеват Адеми) не бил во полза на албанскиот граѓанин и дека усвојувањето на овој предлог-закон само ќе значи доплнителна нестабилност помеѓу Македонците и Албанците.
„Интересот на Адеми за правата на Албанците и ист каков што е интересот на Теута Арифи за загадувањето кое ги мачи Албанците и Македонците во Тетово или интересор на Села за струшката депонија од која се гушат и Македонци и Албанци. Не, ова е политичко алиби на ДУИ, кој изгуби 10 пратеници поради корупцијата и неработењето и барањето поткуп од Изет Меџити во Чаир или Теута Арифи во Тетово. Граѓаните ги казнија ДУИ оти им бараат пари за секој еден документ да извадат од општината“, рече Милошоски.
По ова, Адеми во одговор кон Милошоски, му призна дека ДУИ бил казнет од граѓаните Албанци.
„Да, ДУИ беше казнет од гласачите, но поради коалицирањето со ВМРО-ДПМНЕ“, одговори Адеми.
Комисијата во моментов е на пауза. Општата расправа за предлог-законот максимум може да трае до завршувањето на работните часови во четврток. Потоа истиот оди на пленарна седница, од каде што треба да се врати во Комисијата за европски прашања на второ читање.